「喂！點解你唔寫篇由男人角度出發的文章？」男朋友突然這樣問我。

「吓！我都唔係男人，唔知你點諗！」

「你之前寫過一篇叫做乜嘢《好男人只不過是......》，其實你可以寫男人眼中的好女人喎。」

「哦！盡力而為啦！男人睇女人好膚淺，一定係要樣靚身材正....」我口中敷衍着，一點也不放在心上。

男友立即反駁：「唔一定，見我同你一齊咪知我唔重視個樣囉！」

彼此，彼此啦。

(閱讀全文)

愛情從來都是折磨人的，由愛神邱比特用箭射中你之時，整個過程就巳經充滿苦澀，因為你未得到愛便先要付出痛，不中愛神的箭便享受不到男女之愛慾。

(閱讀全文)

和幾個女友一齊下午茶，聊天話題由買鞋子到男孩子，女友Ａ說：「前年我買了一對鞋，超好着，早輪我行街，見到鞋舖出咗一模一樣的鞋，我即刻買多一對．．．．」

女友Ｂ立即搭咀：「點解要買一樣的鞋？咁咪唔覺有新鞋着囉！係都買唔同色啦，我一定唔會買同一樣的鞋．．．．」

女友Ｃ又加把口：「咁又係喎，幾大都唔同色，我試過一次過買咗四隻唔同色但同款的鞋，因為隻隻色都靚，都係嗰句，易襯衫．．．．．」

(閱讀全文)

致姊姊妹妹書：

十三日啦，幾辛苦先至忍住唔出嚟講嘢，一切都交俾倪中年去搞，鬼叫個爛攤子係佢搞出嚟，我同佢講咗十萬次，偷食唔緊要，但唔該抺嘴，而家仲黐件咁既嘢埋身，條靚妹擺明想出位，唔係你以為佢真係貪你係才子同靚仔?

身為玉女掌門人，呢啖氣點吞得落，我要撇仔都唔會益你，而家倪中年出到一哭二鬧三上吊，我咪俾佢躝返嚟我身邊，有姊妹問，我做乜仲同個Cheap佬結婚？我話點解唔結，而家咪話俾全世界知，啲靚妹卜卜脆好易碎，有身材但冇腦袋，男女之間除咗情同慾之外，仲有好多計算，同打場仗冇乜分別，呢場仗，我一句話都唔使講就贏咗你個靚妹，同老娘爭，你未夠班！

你地梗係會問，咁你同個Cheap佬結婚咪一樣俾人鬧死蠢，唔抵可憐，但佢地真係一啲都唔明白，呢個男人我對咗成二十年，對我來講，佢巳經淪為我屋企既一件傢具，嚴格來說只是攞嚟『啷腳』的一張矮凳，雖然結構出現問題，但掉咗佢又可惜，放响屋企又唔阻地方，咪擺住先，我出名環保嘛！

至於結咗婚之後，唔係只有男人先至可以去『玩』，以後我俾傳媒影到同毒廇明濕吻，同古怪基手拖手佢都冇聲出，以前佢食硬我，以後我食硬佢，男女關係就如此了。

我現在最常做的事就係用張凳啷住隻腳，然後細心閱讀我助養的仔仔女女寄給我的信，好多年前已經了解，溫暖的愛是由他們給我，不是靠那張有結構性危機的凳仔給我的！！！

 掌門人上

玉女掌門人周慧敏『終於』同佢個有中年結構性危機的才子男友分手，我話終於，是因為每一次有倪震偷食的新聞出現時，我都總會想，呢次仲唔甩？仲忍得？

但每一次掌門人總叫我這些凡男友偷食即冇得留低的烈女大叫佩服，周慧敏『再一次』原諒他這個相戀十多年的偷食男，玉女心經果然練到出神入化，世事不縈於懷，無憎惡愛慾........

一對男女如何相處，旁人根本無法得知，作為一個純粹八卦的旁觀者來看，只可以從見了光的事件來說三道四一番。分手要分別出聲明，而且聲明有好大可能同樣出自偷食男自命不凡的手筆，有人形容看後為之動容，我反而有點反胃呢！

無論這兩封所謂聲明是否出自倪震之手，我都覺得這個男人真的無藥可救，男未婚，女未嫁，你絕對可以再選擇，但出事後，男的口口聲聲的認錯，但在聲明中卻暗嘲傳媒令到他們分手，不忿怨氣充斥紙上，就好像一個賊偷嘢，你地見到咪見到囉，報咩警啫！多事。

至於由掌門人出的聲明，如果真是由倪震代筆就一點都不出奇，因為滿紙盡是一個中年男人腦神經自瀆的謊言，『沒有倪震，成就不了今天的周慧敏』、『我的伴侶絕對犯得起這個錯誤』等，每看一次，總要為這個玉女掌門人悲哀一次，之前巳經歷無數次的背叛，到最後都要俾偷食賤男再過一戙，借女人把口再轟轟烈烈的讚自己一次，好橋！

但亦不需要同情她，一切都是自召的，由第一次的原諒，便可以預見今日的局面，因為行為基於後果形成，當日沒有正視這個有潛在結構性危機的中男，到今日咪變成危樓。

如果我係玉女，我諗我會即刻去驗身。睇睇有冇中梅毒！

首先聲明，我沒有窺私癖，只不過是那個女人實在太大聲，我一踏入舖頭便巳經聽到她高十度的聲音向面前的男人大叫：『Can you take it back？』且連續問了不下十幾次！ 

我承認有點八卦，於是便選擇了坐在他們後面的一張枱，只不過想了解一下為何那女的這樣光火，於是又讓我見識到一對男女的一種相處模式。那女的以半中半英不停數落對面的男人，而那男人身邊還有另一個朋友。聽到那女人的說話，很自然就想到這個男的一定講了一些冒犯了女的說話，於是便竪起耳仔聽那男人說了甚麼？ 

但可惜，女人根本沒有俾機會男的說，她只是一輪咀，反反覆的說：「你講啦，唔好話我唔俾機會你講……….我俾十分鐘你講﹙然後對住另一個朋友講﹚佢一分鐘都講唔到四句話，你講啦，次次都係咁，要你講，你就停十幾秒都唔開口，每次都講唔夠幾句，我開始計時，你講啦………..」以上說話是重覆十次以上，而且她真的舉起手錶計時！ 

我心中忍不住說：「你停口俾佢講啦，你咁既態度叫人點講？個男人又冇鬼用，拍枱叫佢收口啦。」 跟住只見男的吚吚哦哦開始說話：「我唔係話啲女人貪錢，不過我…….﹙女人插口：你咁都唔係侮辱女人﹚我係話我回流返香港，搵唔到嘢做﹝咁你就可以講啲咁既說話？﹞除非我好多錢唔使老婆做啦……….」 

哦！原來咁小事，真係唔明個女人做乜咁勞嘈，香港人缺乏耐性，搶着說話，而且往往將自己的意見「強姦」別人的說話，於是再講多久都沒有用，因為大家用唔同的Channel通話，大家回想一下，你對上一次，是甚麼時候完整的聽完別人一句話，然後才開口？是不是想不起？

下次嘗試聽完別人的話才發表高見吧！ 

後記：其後我朋友到了，因為我不可以同一時間處理兩段劇情，所以惟有暫時放下那男女，但到最後兩人是竟是手拖手的離開………..於是我只能說一句，男女之間，往往是一個願打，一個願捱；又或者愛你才駡你？！

李碧華曾經講過：好男人不過是一瓶好的驅風油……

但自從白花油王子承認自己可以乾濕電兩用之後，呢句話可能成為疑問，因為究竟是好男人定係好女人才是一瓶好的驅風油？？？？

踏入男女失衡年代，男人的價值又有何轉變？這年代，相信冇乜女人會諗住放一樽驅風油在她的LV Monogram大袋中，萬一倒瀉了，點拎去米蘭站放！

現今好男人的定義究竟係點？

我認為不能一概而論，不同年齡會有不同需求。

先講二十歲左右的女孩子，要求可以好簡單，好男人可能只是一件着得出街見人的靚衫，唔使着得舒服，但千祈咪cheap，唔係Prada都要係Zara，仲要俾人一眼睇得出牌子，換季一定要跟到貼。怕唔怕下季out？質地差喎？Who cares？最多着一季啫！唔使咁講究。

至於三十歲有些少歷練的女人，好男人就起碼是一個名牌手袋，最好係Hermes，Bottega Veneta，有錢都唔係即刻有貨，waiting list水蛇春咁長，有一個就可以縱橫江湖，傲視同輩，況且一個易襯的名牌手袋，除咗可以平時用嚟行街，出席晚宴都可應付自如。

到了四十歲的中女，本身巳是一個名牌手袋，到時就會追求一對舒適的鞋子，好男人在她們心中，就只是一對唔頂趾，有啲款，行好耐都唔會痛的『好鞋子』，可以陪佢走天涯，咪以為佢地要求低咗，但其實她們巳悄悄的到了另一層次，大部分人都只會留意對方樣貌及身裁，但原來懂得看人的會看他的鞋子和手指，這些會暴露一個人的真實修養。

每一個女人應該要經歷過以上的裝扮過程，說到底，好男人都只是女人的一件裝飾品，一定要令我們更漂亮，更自信，如果你的男人沒有以上的功能，請立即拎去米蘭站Trade，然後再入新貨，唔好遲啦，姐妹！

某日，到商場逛逛，正想扮吓城中名媛，嘆high tea，玩悠閒，啱啱坐落叫了最愛的咖啡及芒果蛋糕，但見到不遠處一男一女以一種十分奇怪的姿勢站立,，其實應該叫<對峙>才正確，兩人面對面，眼望眼，身體語言告訴我，他們沒有即時開拖的可能，但究竟他們在幹甚麽？

基於好奇，於是我將自己的注意力由芒果蛋糕轉到那一對男女身上，因為由我坐下到咖啡，蛋糕上枱，足足有十幾分鐘他們還是維持那一個姿勢，男的就像捧捧堂其中一個你永遠叫不出名的男孩，而女的一眼望上去便知是剛放學，在商場洗手間換掉校服的女學生，經過十多分鐘的觀察，明白到兩人正在鬧意見，但我不明白他們何不坐下好好的傾掂，而要選擇鬥企這個方法來處理二人之間的問題！

男女之間從來都是一場戰爭，你要在這場戰役中取得優勢，耐性是必需，但我未見過這樣有耐性的一對，為了打發時間，於是心中模擬他們的對話-----

女：死白痴仔，企係度唔出聲！你唔出聲我都唔會出聲架！

男：我今日企唔贏你，我仲使出嚟行？

女：我平時去排隊去買限量版環保袋，閒閒地企一晚，你同我鬥？

男：唓！我幫你去企唔少啦，我點都企硬……..不過今晚約咗細榮打機喎，唔睇戲事少，唔打機就事大喎？！

下刪至少三百字，因為我大大話話睇咗佢地四十分鐘，到最後，只見男的向女的細細聲講了一句，然後女的不情不願的開步走，而男的則死死氣的跟在後面，表面好像女的在這場戰役中取得勝利，但其實她是輸了給細榮和他的遊戲機。

對於一個企十分鐘就叫救命的我，根本不可能發動這樣的戰爭，所以曾經以這樣方式同戀人鬥氣，一心諗住悶和的朋友，可否告訴我，你地當時究竟諗緊乜？