「喂！點解你唔寫篇由男人角度出發的文章？」男朋友突然這樣問我。

「吓！我都唔係男人，唔知你點諗！」

「你之前寫過一篇叫做乜嘢《好男人只不過是......》，其實你可以寫男人眼中的好女人喎。」

「哦！盡力而為啦！男人睇女人好膚淺，一定係要樣靚身材正....」我口中敷衍着，一點也不放在心上。

男友立即反駁：「唔一定，見我同你一齊咪知我唔重視個樣囉！」

彼此，彼此啦。

直到早前，和幾個男性朋友閒聊之際，由國際大事聊到男女感情及兩性關係，男友這番話突然浮上心頭，於是就向在座男士做了一份問卷，看看他們心目中的好女人究竟是如何？

友人Ｍ：「好女人？可愛活潑，溫柔咁啦，冇乜準則喎.....」說時語氣猶疑。

其他朋友都一樣，講了大堆極度抽象的形容詞，放在任何女人身上都可以，不得巳便將問題範圍收窄，「咁你地想邊個做你女友呀？」

一問這句，大家精神來了。友人Ｂ立即說：「傅穎呀，直情係我心目中的女神！」

「嘩！唔得喎，好女人呢期點可以唔係周秀娜呀，幾好呀，佢响中環就咁剝衫，睇唔到好蝕呀，仲有Angelababy......」友人Ｍ二話不說就反駁。

一直在旁默不作聲的Ｄ君，也忍不住細細聲講：「我覺得阿嬌好好喎！」說完有點心虛的望一望其他朋友，一副很怕被圍插的樣子。

我見他們討論得很興奮樣子，但全部都只環繞着她們的外表，沒好氣的問：「莫非你們認為好女人就只有外表，不需要有內涵？不看她們的本質同性格？」

Ｄ君怯怯地說：「阿嬌內涵都好好！」

Ｍ君就比較坦白：「係！女人好極都要睇樣，豬扒我唔得，內在美都重要，不過我未去探索你的內在美前，唔該用外在美吸引我先。」

「咁講鄭欣宜、小儀同何韻詩唔夠靚就唔係好女人啦？」我咄咄逼人的反問。

「又唔可以咁講，佢哋都好好，係好女人......」他們額上開始冒汗。

「好在邊度呢？」我繼續追問。

「好在........唔係我女朋友囉！」Ｍ君說完，大家都鬆一口氣。